MI v SRH: சூடான சூர்யா; குங் ஃபூ பாண்டியா; கம்பேக் வெற்றி - ஹைதராபாத்திற்குக் கடிவாளம் போட்ட மும்பை!

யானைக்கும் அடி சறுக்கும் என்பது போலத் தொடர்ந்து இரண்டு தோல்விகள், ராஜஸ்தானுடன் போராடி பெற்ற வெற்றி என ஹைதராபாத் சன்ரைசர்ஸ் சறுக்கிச் சறுக்கி, ஊட்டியிலிருந்து குன்னூர் வந்துவிட்டது. இனியும் சறுக்கினால், மேட்டுப்பாளையம் பஸ் ஸ்டாண்டே வந்துவிடும் என்பதால், இந்தப் போட்டியில் வென்று பிளேஆஃப் வாய்ப்பை பலப்படுத்த வேண்டிய கட்டாயம் அந்த அணிக்கு! பாயின்ட்ஸ் டேபிளை தலைகீழாக வைத்துப் பார்த்தால் டாப்பில் இருக்கும் மும்பை இந்தியன்ஸ் அணி, இந்தப் போட்டியிலும் தோற்றால் `11வது' இடத்திற்குத் தள்ளப்படும்.

மும்பை வான்கடே மைதானத்தில் நடந்த இப்போட்டியில் டாஸ் வென்ற மும்பை அணி, பந்துவீச்சைத் தேர்வு செய்தது. மும்பை அணியில் கோட்சிக்குப் பதிலாக அன்ஷுல் கம்போஜ் களமிறங்கினார். ஹைதராபாத் அணிக்கு மயங்க் அகர்வால் திரும்பினார். MI v SRH

ஹைதராபாத் அணிக்கு டிராவிஸ் ஹெட்டும், அபிஷேக் சர்மாவும் தொடக்கம் கொடுத்தனர். நுவான் துஷாரா வீசிய முதல் ஓவரில் 7 ரன்கள் கிடைத்தன. அறிமுக வீரர் காமோஜ் வீசிய 2வது ஓவரில் ஹெட்டின் ஃபோர் மற்றும் அபிஷேக்கின் சிக்ஸுடன் 14 ரன்கள், துஷாராவின் 3வது ஓவரில் 7 ரன்கள் கிடைத்தன. துஷாராவின் 'ஸ்விங் அண்ட் ஸ்லிங்' பந்துவீச்சை விளாச முடியாமல் போராடிக்கொண்டிருந்தது ஹெட் - அபிஷேக் கூட்டணி. இந்தப் போராட்டமானது இன்ஸ்விங் மற்றும் அவுட்ஸ்விங் யார்க்கர்களோடு வந்த பும்ராவின் 4வது ஓவரிலும் தொடரவே, அந்த ஓவரில் 4 ரன்கள் மட்டுமே கிடைத்தன.

கம்போஜ் வீசிய 5வது ஓவரில் தனது முதல் சிக்ஸை விளாசியதோடு, அடுத்தடுத்த ஃப்ரி ஹிட்களாலும் பவுண்ட்ரிகளாலும் 19 ரன்கள் குவித்து, முதல் பிக் ஓவராக அதை மாற்றினார் ஹெட். பும்ரா வீசிய 6வது ஓவரில், அவுட்சைட் எட்ஜில் இஷானிடம் கேட்ச் ஆகி அபிஷேக் வெளியேறினார். பவர்ப்ளே முடிவில் 56 ரன்களுக்கு 1 விக்கெட் இழந்திருந்தது ஹைதராபாத் அணி. கேப்டன் ஹர்திக் பாண்டியா வீசிய 7வது ஓவரில் 11 ரன்கள் கிடைத்தன. கம்போஜ் 'எக்ஸ்பென்ஸிவ்' ஆக இருந்தாலும், 8வது ஓவரையும் அவருக்கே வழங்கினார் ஹர்திக். அதற்குப் பலனாக ஹெட், துஷாரா கைகளுக்கு கேட்ச் அளிக்க, அதைத் தவறவிட்டார் துஷாரா. ஏற்கெனவே ஹெட்டை போல்டு ஆக்க, அது க்ரீஸ் நோ பால் என்பதால், ஃப்ரி ஹிட்டில் தப்பித்திருந்தார் ஹெட். 4வது பந்தில் மயாங் அகர்வாலை போல்டு ஆக்கி, தனது முதல் ஐ.பி.எல் விக்கெட்டை வீழ்த்தினார் கம்போஜ்.MI v SRH

ஹர்திக் வீசிய 9வது ஓவரில் 11 ரன்கள், கம்போஜ் வீசிய 10வது ஓவரில் 6 ரன்கள் கிடைத்தன. பியூஷ் சாவ்லா வீசிய 11வது ஓவரில் ஹெட்டும் வெளியேற, மும்பை பக்கம் காற்றடிக்கத் தொடங்கியது. 12வது ஓவரில் ஹர்திக் வீசிய லென்த் பாலில் நிதீஷ் ரெட்டியும் அவுட் ஆனார். அந்த ஓவரில் 4 ரன்கள் மட்டுமே கிடைத்தன. 12 ஓவர்கள் முடிவில் 4 விக்கெட்டுக்கு 96 ரன்கள் எடுத்து, திணறிக்கொண்டிருந்த அணியைக் கரைசேர்க்க வேண்டிய பொறுப்பு கடப்பாரை க்ளாஸனுக்கும் யான்செனுக்கும் வந்தது. 13வது ஓவரில் பியூஷின் முதல் பந்திலேயே இன்சைட் எட்ஜில் போல்டு ஆனார் க்ளாசன். பும்ரா வீசிய 14வது ஓவரில் 6 ரன்கள் கிடைத்தன. 36 பந்துகளாக பவுண்டரி இல்லாமல் டயர் வண்டி ஓட்டிக்கொண்டிருந்த ஹைதராபாத்திற்கு, பியூஷின் 15வது ஓவரில் 6, 4 எனக் கைகொடுத்தார் யான்சென்.

ஹர்திக்கின் 16வது ஓவரில் ஷாபாஸும் யான்செனும் வெளியேற, அந்த ஓவரில் 5 ரன்கள் மட்டுமே கிடைத்தன. பாண்டியனின் ராஜ்ஜியத்தில் உய்யலாலா..! 7 விக்கெட்கள் இழந்து நொந்து நூலாகிக்கொண்டிருந்தது ஹைதராபாத். பியூஷ் வீசிய 17வது ஓவரில் சமத்தும் எல்.பி.டபிள்யூ ஆனார். இம்பேக்ட் பிளேயராக சன்வீர் களமிறங்கினார். துஷாரா வீசிய 18வது ஓவரில் 12 ரன்கள், பும்ரா வீசிய 19வது ஓவரில் 8 ரன்கள் கிடைத்தன. ஹைதராபாத்தை ஒரு கௌரவமான ஸ்கோரை எட்ட வைக்க கேப்டன் கம்மின்ஸ் தனியாகப் போராடிக்கொண்டிருந்தார். துஷாரா வீசிய 20வது ஓவரில், கம்மின்ஸின் அதிரடியால் மொத்தம் 17 ரன்கள் கிடைக்க, 8 விக்கெட்கள் இழப்பிற்கு 173 ரன்கள் என்ற கௌரவமான இலக்கை ஹைதராபாத்தால் வைக்க முடிந்தது. கேப்டன் கம்மின்ஸ் 17 பந்துகளுக்கு 35 ரன்கள் எடுத்திருந்தார். MI v SRHஹெட் மட்டும் 30 பந்துகளுக்கு 48 ரன்கள் அடிக்க, ஏனைய பேட்ஸ்மேன்கள் சொற்ப ரன்களில் வெளியேறியதால், ஹைதராபாத்தால் பெரிய இலக்கை வைக்க முடியாமல் போனது. மறுபுறம், மும்பை அணிக்கு கேப்டன் ஹர்திக்கும், பியூஷும் தலா மூன்று விக்கெட்கள் வீழ்த்தியிருந்தனர். ஆனால், மோசமான ஃபீல்டிங்கானது அட்டகாசமான பந்துவீச்சுக்கு வில்லனாக மாறியது.MI v SRH

174 என்ற இலக்கை துரத்திய மும்பை அணிக்கு, ரோஹித்தும் இஷான் கிஷனும் தொடக்கம் கொடுத்தனர். புவனேஷ்வர் குமார் வீசிய முதல் ஓவரில் பவுண்டரிகளால் 13 ரன்கள் குவித்தது மும்பை. ஒயிடு பவுண்ட்ரியோடு தொடங்கிய யான்செனும் 2வது ஓவரில் அடுத்தடுத்து பவுண்டரிகளைக் கொடுத்தாலும் இஷான் கிஷனின் விக்கெட்டை தூக்கினார். நமன் தீர் களமிறங்கினார். புவனேஷ்வர் குமார் வீசிய 3வது ஓவரில் 4 ரன்கள் மட்டுமே கிடைத்தன. கேப்டன் கம்மின்ஸ் வீசிய 4வது ஓவரில் எட்ஜ் ஆகி க்ளாஸனிடம் கேட்ச் ஆகி ரோகித் வெளியேறினார். கம்மின்ஸின் ஓவரில் திணறிக்கொண்டிருந்த சூர்யகுமார் யாதவ், அந்த ஓவரை மெய்டன் ஆக்கினார்.MI v SRH

புவனேஷ்வர் குமார் தான் வீசிய 5வது ஓவரின் முதல் பந்திலேயே நமன் தீரை வெளியேற்றினார். 9 பந்துகளைப் பிடித்த நமன், பூஜ்ஜியத்தில் வெளியேறினார். சூர்யகுமார் - திலக் கூட்டணி மீது பொறுப்பு விழுந்தது. கம்மின்ஸ் வீசிய 6வது ஓவரை பவுண்டரியுடன் தொடங்கினார் திலக் வர்மா. 'டீப் பேக்வேர்ட் ஸ்கொய்ர் லெக்கில்' தன் ஸ்டைலில் சிக்ஸ் விளாசினார் சூர்யா. ஃபுல் லெந்த் பந்தை டீப் ஃபைன் லெக்கில் பவுண்ட்ரிக்குப் பறக்கவிட்டார் திலக் வர்மா. அந்த ஓவரில் 16 ரன்கள் கிடைத்தன. பவர்ப்ளே முடிவில் மூன்று விக்கெட் இழப்பிற்கு 52 ரன்கள் என்ற நம்பிக்கையான நிலையிலிருந்தது மும்பை.

யான்சென் வீசிய 7வது ஓவரில் எட்டுத்திக்கும் பந்துகளைப் பறக்கவிட்ட 360° சூர்யா, அந்த ஓவரில் 22 ரன்கள் குவிக்க உதவினார். 'மேல ஏறிவாறோம் நீ ஒதுங்கி நில்லு' என விளாசிக் கொண்டிருந்தது மும்பை. நடராஜன் வீசிய 8வது ஓவர் பவுண்டரியுடன் தொடங்கினாலும், மொத்தம் 5 ரன்கள் மட்டுமே கிடைத்தன. நிதிஷ் குமார் வீசிய 9வது ஓவரில் 4 ரன்கள், கம்மின்ஸ் வீசிய 10வது ஓவரில் 1 ரன் என ஹைதராபாத்தும் தன் பங்கிற்குப் பதிலடி கொடுக்க, "பொறுக்காதே..." என மும்பை ரசிகர்கள் நெட் ரன் ரேட் கணக்கெல்லாம் போடத் தொடங்கினர். நடராஜன் வீசிய 11வது ஓவரில் ஆஃப் சைட் பவுண்டரியுடன் 9 ரன்கள் கிடைத்தன. அதிரடிகள் இல்லை என்றாலும், விக்கெட்டுகள் இல்லை என்பது மும்பைக்குச் சற்று ஆறுதல் தந்தது.

நிதிஷ் ரெட்டியின் 12வது ஓவரில் பவுண்டரிகள் பறக்க, 12 ரன்கள் கிடைத்தன. 48 பந்துகளுக்கு 69 ரன்கள் என்று ஓரளவிற்கு எளிய இலக்குடன் இருந்தது மும்பை. யான்சென் வீசிய 13வது ஓவரிலும் பவுண்டரிகளைப் பறக்கவிட்ட சூர்யாவால் அந்த ஓவரில் 14 ரன்கள் கிடைத்தன. 30 பந்துகளுக்கு அரை சதம் கடந்தார் சூர்யகுமார் யாதவ். புவனேஷ்வர் குமார் வீசிய 14வது ஓவரில் 9 ரன்கள், ஷாபாஸ் சுழற்றிய 15வது ஓவரில் 11 ரன்கள் கிடைத்தன. 64 பந்துகளுக்கு 103 ரன்கள் சேர்த்தது சூர்யகுமார் - திலக் கூட்டணி.

நடராஜன் வீசிய 16வது ஓவரிலும் தனது கதகளியைத் தொடர்ந்தார் சூர்யகுமார். திலக் வர்மாவும் தன் பங்கிற்கு பவுண்டரியைப் பறக்கவிட, அந்த ஓவரில் 10 ரன்கள் கிடைத்தன. கம்மின்ஸ் வீசிய 17வது ஓவரை, வறுத்தெடுத்த சூர்யகுமார் 18 ரன்கள் குவித்தார். சூர்யா சூடானேன்ன்ன்! வெற்றிக்கு 7 ரன்கள்தான் தேவை என்ற நிலையில், 18வது ஓவரை நடராஜன் வீசினார். திலக் வர்மா ஒரு சிங்கிள் தட்ட, க்ரீஸுக்கு வந்த சூர்யா டீப் ஸ்கொயர் லெக்கில் சிக்ஸரைப் பறக்கவிட்டு மும்பைக்கு வெற்றி தேடித் தந்தார். அதேநேரம் 51 பந்துகளில் தன் சதத்தையும் கடந்தார்.MI v SRH

அடுத்தடுத்து வீழ்ந்த மூன்று விக்கெட்கள், அதைத் தொடர்ந்து வந்த மெய்டன் எனத் துடிதுடித்துக் கொண்டிருந்த மும்பை அணிக்கு சூர்யகுமார் - திலக் வர்மா கூட்டணி வெற்றியை வாங்கிக்கொடுத்திருக்கிறது. நிதானம், பொறுப்பு, அதிரடி என அட்டகாசமான பங்களிப்பை வழங்கியது. பெரிய அளவில் ரன் பங்களிப்பை திலக் வர்மா வழங்கவில்லை என்றாலும், சூர்யாவின் தளபதியாகப் பக்கபலமாக நின்றார். இப்போட்டியில் தோற்றிருந்தால் கிட்டத்தட்டத் தொடரிலிருந்து வெளியேற வேண்டிய மும்பை, இந்த வெற்றியில் மீண்டும் கோதாவில் குதித்துள்ளது. ஆனாலும் அது பகல் கனவே! மறுபுறம், ஹைதராபாத்திற்கு இத்தோல்வி நெருக்கடியை உருவாக்கியுள்ளது. இனிவரும் எல்லா போட்டிகளிலும் வெற்றிபெற்றாக வேண்டிய சூழல் அந்த அணிக்கு உருவாகியுள்ளது.பிளேஆஃப்க்கு எந்த நான்கு அணிகள் செல்லும்? கமென்ட்டில் சொல்லுங்கள்.


http://dlvr.it/T6WjCm