LSG v KKR: சர்ப்ரைஸ் ஆன லக்னோ; டேபிள் டாப்பரான கொல்கத்தா! என்ன நடந்தது?

கட்டாயம் வென்றாக வேண்டிய கட்டத்தில் சொந்த மைதானத்தில் ஒரு போட்டியை இழந்து நெருக்கடிக்குள்ளாகியிருக்கிறது லக்னோ அணி.LSG v KKR

`Strike The Gold' என்போமே, நடப்பு சீசனில் கே.கே.ஆருக்கு ஓப்பனிங் பார்ட்னர்ஷிப் விஷயத்தில் அதுவே நடந்திருக்கிறது. ஒன்றல்ல, ரெண்டல்ல பல ஆண்டுகளாகவே சரியான ஓப்பனிங் பார்ட்னர்ஷிப்தான் கே.கே.ஆரின் முதல் தலைவலி. கடந்தாண்டு முதல் எட்டு போட்டிகளில் மட்டும் ஆறு ஓப்பனிங் காம்பினேஷன்களை முயன்றிருந்தனர். ஆனால் இந்தாண்டு கே.கே.ஆர் கவலையேபடாமல் இருந்தது ஓப்பனிங் பார்ட்னர்ஷிப்பை பற்றி மட்டும்தான். அந்தளவு சால்ட் - நரைன் கூட்டணி அந்த இடத்தை ஆக்ரமித்துள்ளது.Salt

பவர்பிளேவுக்குள் இரு ஓப்பனர்களுமே 200+ ஸ்ட்ரைக்ரேட்டோடு ரன்களைக் குவிப்பது, எத்தகைய பௌலிங்கையும் அட்டாக்கிங் மைண்ட் செட்டோடு எதிர்கொள்வதெல்லாம் ஓர் அணிக்கான ஜாக்பாட்தான். இந்தாண்டு வேறு எந்த அணிக்கும் கிட்டிடாத அத்தகைய வாய்ப்பு கே.கே.ஆருக்கு அமைந்திருக்கிறது. இப்போட்டியுடன் சேர்ந்து ஆறு 50+ பார்ட்னர்ஷிப்களை இக்கூட்டணி அமைத்திருந்தது. இப்போட்டியில்கூட வெறும் 3.4 ஓவர்களிலேயே 50 ரன்களை மின்னல் வேகத்தில் சேர்த்துவிட்டனர். தொடக்கத்தில் இவர்கள் ஏற்படுத்தும் தாக்கம்தான் போட்டி முழுவதும் மற்றவர்களது இன்னிங்ஸ்களுக்கும் கடத்தப்படுகிறது. Narine

ஒருவரது மெதுவான ஆட்டம் அடுத்தவரது தலையில் பளுவாக அழுத்தம் சேர்ப்பதில்லை. போர் முனையில் மோதும் போதே சாணைப் பிடிக்கப்பட்டு கூர்மையாகும் இரு வாள்களைப் போல் ஒருவரது ஆட்டம் மற்றவரையும் தாங்கிப்பிடித்து தூக்கி நிறுத்துவதுதான் இவர்களது சிறப்பம்சம். குறிப்பாக இந்தியாவின் ஓப்பனராக சேவாக் கிடைத்தது போல் நரைன் கே.கே.ஆருக்கு எதிர்பார்க்காமல் கிடைத்த எக்ஸ் ஃபேக்டர்.

முதல் ஏழு பந்துகளில் 10 ரன்களை மட்டுமே எடுத்திருந்த நரைன், அடுத்த 17 பந்துகளில் 43 ரன்களைக் குவித்து அரைசதத்தையும் அடித்ததோடு அணியின் ரன்ரேட்டையும் பெருக்குத்தொடரில் அதிகரிக்க வைத்தார். பின்ச் ஹிட்டராக ப்ரைம் டைமில் மிளிருகிறது அவரது பேட். பௌலிங்கிலோ 7-க்குக் கீழான எக்கானமியும் போட்டி தவறாமல் எடுத்துத் தரும் விக்கெட்டுகளும் அவரை இந்த சீசனின் தலைசிறந்த ஆல்ரவுண்டர்களில் ஒருவராக அடையாளம் காட்டுகிறது. இந்தப் போட்டியில்கூட பவர்பிளேயில் வீசிய ஓவரில் வெறும் 4 ரன்களை மட்டுமே நரைன் கொடுத்திருந்தார்.LSG v KKR

இப்படிப்பட்ட ஒப்பற்ற ஓப்பனர்களை எப்படி ஆட்டமிழக்க வைப்பது என்பதே எதிரணியின் நிகழ்ச்சி நிரலில் முதலாவதாக இருக்க வேண்டும். ஆனால் லக்னோவிடமோ அப்படிப்பட்ட திட்டங்கள் எதுவுமே கைவசம் இருந்தது போல் தெரியவில்லை. களத்தின் தேவை என்ன, சந்திக்கும் பேட்ஸ்மேன்கள் எத்தகையவர்கள் என்பதெல்லாம் பந்தின் லெந்தை முடிவு செய்யும் காரணிகள். அந்தப் பால பாடத்தை மொத்தமாகவே மறந்து ஃபுல் லெந்திலோ அதிக ஷார்ட்டாகவோ அடிப்பதற்கு ஏதுவாக பந்துகளை வீசியிருந்தனர். அவைதான் நரைன் மற்றும் சால்டால் பெரும்பாலும் பவுண்டரிக்கும் சிக்ஸருக்கும் பறக்க விடப்பட்டன. இதைப் புரிந்த பிறகும்கூட லக்னோ பௌலர்கள் அதற்கேற்ப தங்களை தகவமைத்துக் கொள்ளத் தவறியிருந்தனர்.

யாஷ் தாக்கூர் வீசிய பவர்பிளேவின் கடைசி ஓவரும், ரவி பிஷ்னாயின் ஸ்பெல்லின் முதல் ஓவரும் சற்றே ஆறுதல். நரைனின் விக்கெட்டை எடுத்தது மட்டுமின்றி மிகச் சிறப்பாக ரவி பிஷ்னாய் பந்து வீசியிருந்தார். நவீனின் பந்துகளும் சற்றே சேதாரத்தைச் சந்தித்திருப்பினும் அவரது பந்துவீச்சில் திட்டமிடல் இருந்தது. சால்டினை ஸ்லோ பாலாலும் ரசலை ஃபுல் லெந்தில் ஆஃப் ஸ்டம்புக்கு வெளியே வீசிய பந்தினாலும் சிக்க வைத்தார். ரிங்குவிற்கு வீசிய ஷார்ட் பாலும் அதே வகைதான்.LSG v KKRலக்னோ களத்தில் முதல்முறையாக டி20 போட்டி ஒன்று 200+ ஸ்கோரை எட்டியதென்றால் அதற்கான காரணம் கே.கே.ஆரின் அதிரடி மட்டுமல்ல லக்னோவின் மோசமான பந்துவீச்சும்தான்.

பவர்பிளேவுக்கும் டெத் ஓவர்களுக்கும் தரப்படும் முக்கியத்துவம் பல போட்டிகளில் அணிகளால் மத்திய ஓவர்களுக்குத் தரப்படுவது இல்லை. பொதுவாக கட்டுக்கோப்பாக பந்துகளை வீசுவதிலும், ரன்களைக் கசிய விடுவதைத் தடுப்பதிலும் மட்டுமே அணிகளின் கூடுதல் கவனம் இருக்கும். இருமுனைகளில் இருந்து அட்டாக் செய்யும் ஸ்பின்னர்கள் அதற்கான வாயிலினை அகலப்படுத்துவார்கள். கே.கே.ஆரின் திட்டமிடல் சற்றே வித்தியாசமாக இருந்தது.

பவர்பிளேவில் 55 ரன்களைக் குவித்திருந்த லக்னோ குல்கர்னியின் விக்கெட்டை மட்டுமே இழந்திருந்தது. ஸ்டோய்னிஸ், பூரன் ஆகியோர் மெகா சைஸ் கேமியோக்களால் எதையும் சாதிப்பவர்கள், எத்தகைய இலக்கை எட்டுவதையும் சாத்தியப்படுத்துபவர்கள். எனவே மத்திய ஓவர்களில் அவர்களைக் கட்டுப்படுத்துவதும், முடிந்தால் அதிவேகமாக அவர்களை வெளியேற்றுவதுமே முக்கியம். கே.கே.ஆர் அதனை திறம்பட நிகழ்த்தி இருந்தது.

களம் ஒத்துழைத்தது, எனவே சுனில் நரைன் மற்றும் வருண் சக்கரவர்த்தியை வைத்து இரு பக்கமும் அட்டாக் செய்திருக்கலாம். ஆனால் அப்படி செய்யாமல் மத்திய ஓவர்களில் சுழல் மற்றும் வேகப்பந்து வீச்சை மாற்றி மாற்றிப் பயன்படுத்தியது கே.கே.ஆர். இது வெகு சிறப்பாகவே கைகொடுத்தது. முதல் ஆறு ஓவர்களில் 55 ரன்களைக் குவித்திருந்த லக்னோ அடுத்த ஆறு ஓவர்களில் 52 ரன்களைக் குவித்திருந்தது. ஆனால் வேறுபாடு ஏற்பட்டது விக்கெட்டுகள் கணக்கில்தான். பவர்பிளேவுக்குள் ஒரு விக்கெட்டை மட்டுமே இழந்திருந்த லக்னோ, அடுத்த ஆறு ஓவர்களில் மேலும் நான்கு விக்கெட்டுகளை பறிகொடுத்தது. அதில் ஸ்டோய்னிஸ், பூரன் ஆகிய அவர்களது இரு நம்பிக்கை நட்சத்திரங்களும் இருந்ததுதான் ஏறக்குறைய லக்னோ சரிந்த புள்ளி.LSG v KKR

7 - 17 ஓவர்களில் சுனில் நரைன் வீசிய இரு ஓவர்கள் தவிர்த்து மற்ற அத்தனை ஓவர்களும் தலா ஒரு விக்கெட்டின் வீழ்ச்சியைப் பார்த்திருந்தன. தொடர்ந்து முறிந்த பார்ட்னர்ஷிப்களால் தேவைப்படும் ரன்ரேட்டில் பாதி அளவிற்குக் கூட லக்னோவால் அடிக்க முடியாமல் போனது. ஹூடா, க்ருணால் பாண்டியா, ஆயுஷ் பதோனி ஆகிய மூவருக்கும் தலா ஒருமுறை கேட்ச் டிராப் செய்து இரண்டாவது வாய்ப்பை கேகேஆர் ஃபீல்டர்கள் வழங்கி இருந்தனர். இருப்பினும் மூவருமே அதன்பின் வெகுநேரம் களத்தில் தாக்குப்பிடிக்க முடியவில்லை. இது தவிர்த்து மிகப்பெரிய அளவில் ஃபீல்டிங் குறைபாடுகள் எதுவும் கேகேஆரின் பக்கம் காணப்படவில்லை. குறிப்பாக பேட்டிங்கின் போது ஆறு பந்துகளில் 25 ரன்களைக் குவித்து இறுதி நிமிடத்தில் மிரட்டி இருந்த அதே ரமன்தீப் சிங் ராகுல் மற்றும் குல்கர்னிக்குப் பிடித்த இரு கேட்சுகளுமே அற்புதமானவை தான். அதே துடிப்பும் உத்வேகமும் கே.கே.ஆரிடம் எல்லாக் கட்டத்திலுமே காணப்பட்டது.

ராகுல் - ஸ்டோய்னிஸ் கூட்டணி அடித்த 50 ரன்கள் மட்டும் வந்து சேராமல் போயிருந்தால் மூன்று இலக்க ஸ்கோரைக் கூட லக்னோ எட்டியிருக்காது என்பதே உண்மை. களத்தில் கிடைத்த டர்னைப் பயன்படுத்தி நரைன் மற்றும் வருண் ஆதிக்கம் செலுத்தினார்கள் என்றால் ரசல் மற்றும் ராணா இருவருமே மிரட்டியிருந்தனர். குறிப்பாக பூரன் மற்றும் ஸ்டோய்னிஸ் ஆகிய இரு முக்கிய விக்கெட்டுகளையும் வீழ்த்திய கட்டத்திலேயே ரசல் போட்டியை அணிக்காக வென்று கொடுத்து விட்டார். LSG v KKR

இந்த வெற்றி கே.கே.ஆரை புள்ளிப் பட்டியலின் முதல் இடத்தில் குடி அமர்த்தி உள்ளது. இத்தொடரில் ரன்கள் அளவில் லக்னோ சந்தித்த மிகப்பெரிய தோல்வி இதுதான், அதுவும் அவர்களது இறுதி ஹோம் கேமில் வந்திருப்பதுதான் கொடுமை.


http://dlvr.it/T6VxvZ